Падчас канферэнцыі ААН па змене клімату, што праходзіла ў Капенгагене (Данія), адбыліся маніфестацыі супраць ядзернай энергетыкі.

Ядзерная энергетыка - гэта зусім не спосаб барацьбы са зменай клімату, паколькі яна небяспечная для здароўя чалавека і навакольнага асяроддзя, патрабуе пастаянных вялікіх выдаткаў і не вядзе да паніжэння выкідаў парніковых газаў, лічаць удзельнікі форума.

Не рабіце клімат ядзерным!» - банэр з такім лозунгам быў вывешаны на будынку «Бэла-цэнтра». Як паведамляе БелаПАН , гэты заклік прагучаў у дэкларацыі кліматычнага форума - 2009 і на статысячнай дэманстрацыі 12 снежня і ў рамках іншых акцый недзяржаўных арганізацый. 

Беларускія ўдзельнікі гэтых падзей, сярод якіх - Беларуская антыядзерная кааліцыя, выступілі з патрабаваннем спыніць будаўніцтва АЭС у краіне. Транспарант «Астравецкая АЭС - дзякуй, не трэба!» быў вывешаны на днях на масточку каля будынку парламента ў Капенгагене. У нядзелю, 13 снежня, да будынка, дзе праходзіць форум, выйшла інтэрнацыянальная група маніфестантаў з лозунгам Stop NPP in Belarus («Не АЭС у Беларусі!»), а 14 снежня гэты ж транспарант быў выстаўлены на акцыі ўсярэдзіне «Бэла-цэнтра» падчас канферэнцыі.

* * *

Грамадскія арганізацыі лічаць праект будаўніцтва атамнай электрастанцыі ў Беларусі небяспечным.

«Экадом», Беларуская партыя «Зялёныя», БелСаЭС «Чарнобыль», міжнародная экалагічная група «Экозащита» у Маскве патрабуюць спыніць будаўніцтва атамнай электрастанцыі. Аб гэтым паведаміла БЕЛАПАН старшыня рады ГА «Экадом» Ірына Сухій.

Па яе словах, асаблівы клопат эколагаў выклікае той факт, што «сістэматычна парушаецца» беларускае і міжнароднае заканадаўства ў гэтай галіне. У прыватнасці, грамадскія слуханні па вызначэнні ўздзеяння на навакольнае асяроддзе будучай АЭС у Астраўцы 9 кастрычніка ператварыліся ў «збор прыхільнікаў АЭС», заявіла Сухій. Прадстаўленая грамадскасці «Заява аб магчымым уздзеянні на навакольнае асяроддзе Беларускай АЭС» выканана з парушэннем патрабаванняў беларускага заканадаўства. Дакумент утрымлівае «грубейшыя памылкі і наўмысна ўводзіць у зман грамадскасць», лічыць прадстаўнік ГА «Экадом», што адпавядае  настрою і іншых грамадскіх арганізацый.

Сухій агучыла патрабаванні экалагічных грамадскіх арганізацый да праекта будаўніцтва АЭС. Па-першае, эколагі дамагаюцца,  каб заказчык  узвядзення атамнай станцыі адклікаў сваю «Заяву аб магчымым уздзеянні на навакольнае асяроддзе беларускай АЭС». Па-другое, яны настойваюць на правядзенні ўсіх этапаў абмеркавання грамадскасцю пытанняў, звязаных з будаўніцтвам АЭС, з «належным адлюстраваннем у адпаведнасці з заканадаўствам Беларусі і міжнароднымі канвенцыямі». Акрамя таго, эколагі маюць намер вылучаць сваіх прадстаўнікоў для ўдзелу ў правядзенні дзяржаўнай экалагічнай экспертызы праекта АЭС у Беларусі і будуць праводзіць грамадскую экалагічную экспертызу.

На падставе афіцыйнай інфармацыі, якая ёсць, грамадскія арганізацыі дайшлі да сцвярджэння, што праект будаўніцтва АЭС у Беларусі не мае неабходных абгрунтаванняў.

 Між тым матэрыялы ацэнкі ўздзеяння на навакольнае асяроддзе будучай АЭС у Беларусі могуць быць адкліканыя для дапрацоўкі.

Канчатковая рэдакцыя справаздачы аб ОВОС беларускай АЭС будзе прадстаўленая РУП «Белнипиэнергопром» службам  Мінпрыроды на дзяржаўную экалагічную экспертызу. Падчас яе правядзення спецыялісты «уважліва разгледзяць, прааналізуюць і ацэняць дакладнасць уліку прапаноў і зацемак, якія паступілі па пытаннях уздзеяння АЭС на навакольнае асяроддзе». Яны таксама ацэняць «адпаведнасць прадстаўленай праектнай дакументацыі патрабаванням заканадаўства ў вобласці аховы навакольнага асяроддзя», гаворыцца ў лісце Мінпрыроды.

Нагадаем, паводле заўваг экалагічнай грамадскасці, найболей сур'ёзнай праблемай у папярэдняй справаздачы аб ОВОС беларускай АЭС з'яўляецца тое, што вызначэнне выкідаў радыёнуклідаў пры максімальнай праектнай аварыі на АЭС заніжанае, прынамсі, у чатыры тысячы разоў; ацэнка выкідаў пры аварыі, якая не прадугледжаная праектам, - у дзясяткі і сотні разоў. Як следства, нават не прадугледжаны  мерапрыемствы па абароне насельніцтва і мінімізацыі наступстваў магчымых аварый.

Навіны па тэме: 

Минэнерго: Решение о строительстве АЭС - политическое и обсуждению не подлежит

Андрей Ожаровский: Отходы АЭС будут храниться в белорусской земле 240 тысяч лет

В Могилеве арестовали участников акции против строительства АЭС