Любоў ЛУНЁВА, 23 лістапада 2012 г.

Камітэт па правах чалавека ААН, разгледзеўшы скаргу па справе "беларускіх тэрарыстаў" Уладзіслава Кавалёва і Дзмітрыя Канавалава, палічыў іх віну недаказанай, а справу - праведзенай з вялікімі парушэннямі. Але беларускі бок так спяшаўся пакараць "вінаватых", што не стаў чакаць вердыкту міжнародных экспертаў. Хлопцаў ужо няма, іх расстралялі. Выправіць такую "памылку" проста немагчыма.

Эксперты Камітэта па правах чалавека, якія прадстаўлялі 18 краін свету, прыйшлі да высновы, што ў справе, распачатай па факце выбуху ў мінскім метро 11 красавіка 2011 года, не было сабрана дастаткова доказаў віны Уладзіслава Кавалёва і Дзмітрыя Канавалава.

Беспрэцэдэнтнай можна назваць саму рэгістрацыю заявы ў ААН ад маці і сястры Уладзіслава Кавалёва - яны звярнуліся 14 снежня, а рэгістрацыя адбылася 15-га, на наступны ж дзень. Хаця звычайна ад падачы заявы да яе рэгістрацыі праходзіць некалькі месяцаў. У гэтым выпадку ў Камітэце ААН улічылі беларускую рэчаіснасць (бо адлік ішоў на гадзіны) і пайшлі насустрач маці. ААН прасіла беларускія ўлады не спяшацца з выкананнем прысуду і зрабіць захады для так званай прамежкавай абароны. Але ў Мінску нікога слухаць не хацелі і ўжо рыхтавалі "расстрэльную каманду".

Беларускі бок, дарэчы, зараз спасылаецца на тое, што рэгістрацыя скаргі Кавалёвых адбылася з нейкімі парушэннямі і таму, відаць, рашэнні Камітэта ААН будзе ігнараваць. Ва ўсялякім разе ў бліжэйшы час мы ўбачым, ці прыслухаецца Беларусь да міжнародных экспертаў. Бо Камітэт ААН па правах чалавека запатрабаваў ад беларускага боку надрукаваць у цэнтральных СМІ тэкст рашэння па справе Кавалёва і Канавалава. Калі жыццё хлопцам выратаваць немагчыма, то трэба хоць абяліць іхныя імёны... Але ніхто не можа сказаць з упэўненасцю, што рашэнне ААН з'явіцца ў афіцыйных СМІ.

Маці расстралянага Уладзіслава Кавалёва не можа стрымаць слёзы, калі чытае высновы экспертаў. За сухімі фразамі стаяць эпізоды тых страшных падзей.

Эксперты на самым пачатку зазначалі, што да Уладзіслава Кавалёва ўжывалася фізічная сіла, каб прымусіць яго агаварыць сябе ў гэтай справе. Калі ж яны прааналізавалі, як дзяржаўныя СМІ асвятлялі тэму тэракта, яшчэ да вынясення рашэння суда называючы Кавалёва і Канавалава цынічнымі злачынцамі, дык заявілі, што ў дачыненні да хлопцаў быў груба парушаны прынцып прэзумпцыі невінаватасці.

Што да суда, то міжнародныя эксперты палічылі, што яго нельга назваць бесстароннім. Дастаткова прыгадаць, што суд не задаволіў амаль ніводнага хадайніцтва адвакатаў, затое ахвотна прыслухоўваўся да пракурораў.

Крытычна выказаліся эксперты і пра рэчавыя доказы, якія меліся ў справе. Усяго пералік парушэнняў складаецца з 8 пунктаў: ад парушанага права на абскарджванне прысуду да незаконнага пазбаўлення грама-

дзяніна краіны права на жыццё.

Беларускія ўлады ўжо бліжэйшым часам атрымаюць рашэнне Камітэта па правах чалавека ААН. Яго прывязуць з Жэневы па дыпламатычных каналах. Маці расстралянага Уладзіслава Кавалёва атрымала яго "паскораным маршрутам" - па міжнароднай пошце.

Народная Воля