Таццяна УЛАСЕНКА

24 верасня 2012 года ў будынку былога коласаўскага ліцэю, а зараз - у судзе Цэнтральнага раёна г. Мінска на 6 сутак пазбаўлення волі  быў пакараны намеснік старшыні Руху салідарнасці "Разам"  Аляксандр Макаеў.  Яго судзілі па артыкуле 23.4 (непадпарадкаванне супрацоўнікам міліцыі) адміністрацыйнага кодэксу Беларусі. Напачатку суда Аляксандр Макаеў заявіў хадайніцтва разглядаць справу на дзяржаўнай беларускай мове, у чым адразу яму было адмоўлена. 

Стала заўважна, што Макаеву кепска, але суддзя Якумчыхін пры гэтым паводзіў сябе даволі агрэсіўна: быў няветлівы, звяртаўся да абвінавачанага са словамі: "Вы што, не ў стане ўсведамляць, што я кажу, адказваць на мае пытанні? Вы - хворы?" Тады Макаеў сказаў, што яму кепска, бо яго да суда не выводзілі ў прыбіральню і трымалі на карачках у кайданках. Суддзя аб'явіў перапынак на 5 хвілін, Макаева вывелі.

Нагадаем, 23.09.2012 года машыну А. Макаева, на якой ён рухаўся на працу, спыніла служба ДАІ. На месцы быў складзены пратакол - за адсутнасць тэхагляду на машыну і спагнаны з яго штраф у памеры 50 тысяч рублёў. Пасля гэтага да машыны А. Макаева падышлі супрацоўнікі міліцыі, затрымалі яго і адвезлі ў Цэнтральны РАУС г. Мінска.

Падчас судовага працэсу А. Макаеў паспеў сказаць журналісту "Новага Часу", што не верыць у выпадковасць гэтага затрымання.

- Калі спыняла служба ДАІ,  побач знаходзілася шмат супрацоўнікаў у штацкім, а таксама прадстаўнікоў розных сілавых структураў. Пасля затрымання службай ДАІ да мяне падышлі супрацоўнікі міліцыі, учынілі ператрус машыны, затым павезлі ў Цэнтральны РАУС г. Мінска. Мне пагражалі крымінальнай справай, выклікалі здымачную групу дзяржаўнага тэлебачання, здымалі мяне на відэакамеру, раскідаўшы вакол мяне ўлёткі "За байкот!", якія знайшлі ў машыне. Затым - болей як праз 6 гадзін - склалі пратакол нібыта за непадпарадкаванне міліцыі, - паспеў распавесці на судзе Макаеў.

Але суддзя адхіліў гэтыя паказанні, бо яны, па яго словах, не тычацца разглядаемай справы.

Сведкам супраць Макаева выступіў супрацоўнік АМАП Тукайла Д.П., які ўдзельнічаў у затрыманні. Ён сцвярджаў, што знаходзіўся ў двух метрах ад супрацоўніка ДАІ і пабачыў, што Макаеў не жадае адчыняць яму дзверы, зачыняе форткі, адмаўляецца паказваць дакументы, аказвае супраціўленне, таму і вырашыў затрымаць Макаева. Адвакатка Макаева знайшла ў словах Тукайлы супярэчнасці, якія пацвярджаліся ёю і Макаевым ускоснымі фактамі: як можна было адначасова аказваць супраціўленне прадстаўніку ДАІ і паказваць яму дакументы на машыну, сплочваць штраф?

Напрыканцы суда Макаеў падкрэсліў, звяртаючыся да суддзі, што падобных спраў супраць яго заводзілася шмат, а першая была распачата падчас выбараў 2006 года.

НОВЫ ЧАС