Палкоўнік спецслужбаў Уладзімір Барадач зноў сцвярджае, што вінаватыя ў "крывавай бойні" ў мінскім метро 11 красавіка 2011 не асуджаныя за тэракт Канавалаў і Кавалёў, а беларускія спецслужбы, якія падпарадкоўваюцца асабіста "сям'і" Лукашэнкі.

Падставай для чарговай размовы з палкоўнікам стала выкладзенае ў Сетцы новае журналісцкае расследаванне, у выніку якога ўсплылі новыя фігуры, якія, магчыма, маглі б праліць святло на тэракт у метро.

- Афіцыйныя ўлады ўжо заявілі, што гэтыя людзі - сапёры. Але чаму іх не дапусцілі да месца трагедыі і адклікалі праз некалькі хвілін пасля прыезду на месца здарэння?

- Мае высновы наступныя: група (па дадзеных МУС) па трывозе выехала да месца тэракту і праз 20 хвілін была на месцы здарэння. У метро яна была ўжо праз 30 хвілін і праз 10 хвілін вярнулася назад. У сувязі з гэтым у мяне напрошваецца шэраг пытанняў не на карысць высноваў следчай групы. Па-першае, сцвярджаецца, што за гэты час (3-4 мін) група агледзела, з іх слоў, шырокую тэрыторыю на прадмет наяўнасці мін і вярнулася назад. Гэта чарговая хлусня. Я выключаю на 90% магчымасць датычнасці дадзеных асоб у поўным складзе да самаго выбуху зарада, загадзя пакінутага ў ножцы лаўкі. Хоць, улічваючы наяўнасць у іх кантрольна-вымяральных прыбораў і сродкаў, прывядзенне выбуховых прылад у дзеянне было б цалкам магчыма.

Па-другое, дадзеных спецыялістаў не дапусцілі да месца выбуху, хоць па ідэі трэба было задзейнічаць усе сілы для пошуку выбухной прылады перад прыбыццём туды Лукашэнкі. Чаму гэтыя хлопцы, якія прыбылі аднымі з першых, не былі дапушчаныя да працы, як і пазней замежныя спецыялісты, практычны вопыт якіх быў куды большы чым у нас. Значыць, была загадзя падабраная група, якая павінна была выканаць указанні зверху і выключыць уцечку інфармацыі з месца здарэння і ў тым ліку і для сваіх спяцоў. Бо спецыялісты, якія прыбылі да месца тэракту, могуць на месцы выбуху вызначыць вагу выбуховага рэчыва, месца яго залажэння, спосаб ўзрывання, тып выбухной прылады і г.д.

Па лаўках, па трупах па прабоінах вызначаецца дакладнае да сантыметра месца залажэння зарада, а таксама наяўнасць і характар паражаючых элементаў.

Значыць - было што хаваць. Бо адразу ўстанаўлівалася тое, што ніякая торба ня выбухала (ні Канавалава, ні Сілуэта, які гуляў яго ролю). Бо адну ножку лаўкі панесла б паралельна цягніку да эскалатара, а другую да калоны, а таго, хто сядзіць на лаўцы, разнесла б на шматкі: ён бы прыліп да столі.

Гэта ламала б усю карціну следства, і торба Канавалава, вакол якой і было сфабрыкаванае абвінавачванне, і якая з'яўлялася асноўным рэчдокам на працэсе, выпадала з доказнай базы. Больш супраць Канавалава і Кавалёва нічога няма. Гэта пацвердзіў на прэс-канферэнцыі Швед, адказваючы на пытанне, як выйшлі на Канавалава: "Мы ведалі, што з цяжкай торбай ён не мог далёка сысці, і яго шукалі ў вызначаным квадраце".

Не было прызнанняў Канавалава, было сістэматычнае выбіванне паказанняў да страты пульса і ўмяшання ўрачоў. Чыстай падробкай было і змесціва склепа Канавалава. Яго нават не павезлі на следчы эксперымент у Віцебск для апазнання прадметаў. Ён бы сам здзівіўся свайму багаццю. Уявіце «спецыяліст» рыхтуецца да пасяўной і купляе каля 20 мяшкоў салетры (і не толькі). Ён не ведае нават, колькі яму неабходна для вырабу бомбы.

Выбуховае рэчыва «кіса», якое было выяўлена ў яго, не даказвае яго віну, а даказвае падлог. Не верыце мне, паверце навукоўцу, спецыяліста міжнароднага ўзроўню доктару навук Захматаву.

Любая новая інфармацыя, нават дадзеныя здымкі, кажуць пра тое, што прадстаўнікі асабістых спецслужбаў "сям'і" Лукашэнкі наладзілі гэтую крывавую бойню з мэтай запалохаць пратэстную масу людзей і дыскрэдытаваць апазіцыю, апраўдаць гвалт над грамадзянамі 19 снежня ў дзень выбараў.

Больш за 50% грамадзян краіны не вераць у непасрэднае дачыненне Канавалава і Кавалёва да тэракту. Што ў дадзеным выпадку павінна зрабіць улада? Так, адказаць на ўсе пытанні і даказаць сваё недачыненне да дадзенага злачынства. Я прапаную выступіць у якасці кампетэнтнага прадстаўніка ад грамадскасці. Паверце, мяне цікавіць толькі ісціна, хай мне дадуць магчымасць пагутарыць з Канавалавым і Канаплёвым і азнаёміцца з трыма старонкамі крымінальнай справы.

Калі ўлада не пры справах, яна дасць нашым людзям на ўсе пытанні пераканаўчыя адказы. Яна не будзе расстрэльваць асноўных сведак жудаснага злачынства.

- А як вы можаце пракаментаваць тое, што зараз адбываецца з МУС - за месяц адтуль за «дыскрэдытацыю» звольненыя двое намеснікаў міністра. Кажуць, што і пад Куляшовым крэсла хістаецца?

- Чыстка будзе працягвацца ва ўсіх структурах улады. Заўсёды яна вядзецца пад пільным кантролем службаў ўнутранай бяспекі. Не лаяльныя да рэжыму, думаючыя або тыя, хто сумняецца, будуць звальняцца ў першую чаргу. Рэжым рыхтуецца да вайны супраць уласнага народу. А для гэтага патрэбныя абмежаваныя, адданыя апрычнікі. Тыя, у якіх здаюць нервы сыходзяць у адстаўку, але большасць - на лаву падсудных, бо з турмы яны не могуць адпомсціць рэжыму за тыя знявагі, якія яны атрымліваюць за сабачую адданасць "сям'і". Гэта інфармаваныя людзі, і яны на волі небяспечныя для "сям'і". Бо з'яўляюцца крыніцамі ўцечкі важнай інфармацыі, якая раскрывае сутнасць рэжыму.

У Лукашэнкі больш ворагаў у дзяржструктурах, адміністрацыі, чым прыхільнікаў. Ён сам іх стварае. У дадзенай сітуацыі я гатовы прапанаваць шлях рашэння беларускага пытання. Ні адзін дыктатар не выйграваў вайну супраць уласнага народу.

"Беларускі партызан"