На абмеркаванне чытачоў: 

Ліст да беларускага народа,  палітычных партый і ўладных структур

Ва ўсім свеце ідзе магутная хваля самавызначэння нават малазначных народаў і спробы фарміравання нацыянальных дзяржаў, часам насуперак агульнапрызнаным прынцыпам (Прыштына, Паўднёвая Асеція, Абхазія).

Ва ўсіх еўрапейскіх дзяржавах, апроч некаторых постсавецкіх, сфарміраваны ці заканчваюць сваё станаўленне паўнавартасныя нацыі. Лепшыя носьбіты нацыянальных духоўных сіл, навукі, культуры, тэхнікі ўтвараюць нацыянальную эліту. Яе аўтарытэт у кожнай краіне безумоўны, падтрымка дзяржавы - вельмі грунтоўная. Беларусы ўсяго гэтага пазбаўлены.

Насуперак логіцы і здароваму сэнсу ў Беларусі - пасля кароткага перыяду нацыянальнага Адраджэння - больш за 15 гадоў доўжыцца шалёная разбеларусізацыя. На тэрыторыі Беларусі мы маем насельніцтва, але не кансалідаваную нацыю. Прэзідэнт і выканаўчая ўлада дзейнічаюць насуперак інтарэсам карэннага беларускага этнасу. Абвешчана, што беларусы - самая інтэрнацыянальны ў свеце народ. А вось нацыі, лічыць нехта, не існуе. Яе кволыя парасткі на самай справе топчуцца. Гэта дастасоўваецца да ўсіх варункаў і пазіцый кансалідацыі людзей у нацыю, найперш беларускай мовы, а таксама праўдзівай гісторыі і нацыянальнай культуры.

Уладзе ў Беларусі настолькі ненавіснае словазлучэнне БЕЛАРУСКІ НАЦЫЯНАЛЬНЫ, што яна "прыватызавала" гэты выраз і 3 траўня 2005 года забараніла яго выкарыстанне грамадскімі арганізацыямі і фондамі. Ствараюцца перадумовы для панавання на беларускай зямлі ва ўсіх сферах жыцця грамадства і дзяржавы чужога нам этнасу.

Так званае дзвюхмоўе ператварылася ў беспрэцэдэнтнае вынішчэнне мовы карэннага насельніцтва. Уся вертыкаль улады размаўляе толькі на мове суседняй дзяржавы. Амаль усё чыноўнікі не ў стане падтрымліваць размову з беларусам - суразмоўцам суайчыннікам. Тым самым яно трэціруе і абражае этнічнага беларуса, стварае яму моўны дыскамфорт. Дзе ж тут роўнасць дзвюх моў? Нам варта патрабаваць вызвалення ад пасады чыноўніка любога ўзроўню, калі ён не валодае беларускай мовай нароўні з мовай суседняй дзяржавы.

І тое, што так склалася гістарычна за стагоддзі панавання расейскага царызму, шавінізму і бальшавізму, не азначае, што моўную сітуацыю і надалей трэба пагаршаць. Наадварот, утвораныя моўныя скрыўленні, перакосы і наогул заганы неабходна неадкладна і ўсяляк выпраўляць.

 У сувязі з сучаснай моўнай сітуацыяй на Беларусі ўзгадаем досвед краіны Ізраіль. У перыяд аліі - масавага выезду яўрэяў у гэту краіну - пераважную большасць насельніцтва складалі выхадцы з СССР. Але ж руская мова не стала ў Ізраілі дзяржаўнай. Дзеля кансалідацыі яўрэйскай нацыі там вярнулі да жыцця амаль што памерлую мову іўрыт, нават не ідыш. У нашай краіне адбываецца супрацьлеглы працэс. Дык можа ізраільцяне зусім дурныя, а нашы правіцелі - з ліку небеларусаў ды тутэйшыя безбацькавічы - мудрацы-саламоны?

Рэальную ўладу і вызначальныя ў краіне пасады кіраўнікоў сілавых структур, тэлерадыёкампаніі, адукацыі займаюць неэтнічныя беларусы ці асобы, што здрадзілі роднаму этнасу. У сённяшніх варунках КРЫТЫЧНАГА СТАНУ БЕЛАРУСКАЙ НАЦЫІ, гэта ніяк нельга дапускаць.

Не выпадкова пры адным міністраў унутраных спраў праявілі сябе магутныя злачынныя групоўкі міліцэйскай мафіі ў Гомелі і Брэсце, пакуль не раскрытыя, і дзейнічаюць многія раённыя групоўкі. Заплямілі сябе й прадстаўнікі ўнутраных войскаў МУС, названыя ў апублікаваным рапарце начальніку Галоўнага ўпраўлення крымінальнай міліцыі генерала Лапаціна.

 Беларусы краіны! Кожны з нас, хто ўсведамляе высокі гонар і годнасць быць сынам (дачкой) Бацькаўшчыны, станем змагарамі за будучыню Беларусі! Замацуем у сваёй свядомасці, што толькі мы - гаспадары дараванай нам Богам краіны, пакінутай нам у спадчыну продкамі.

Беларусь ужо падведзена да таго, што не існуе беларускі нацыянальны капітал у памерах, неабходных для непазбежнай прыватызацыі нацыянальнага багацця, створанага папярэднімі пакаленнямі працаўнікоў. Шалёнай падаткавай палітыкай, самай жорсткай у свеце, капітал абяскроўліваецца і руйнуецца Указамі прэзідэнта, што супярэчаць карэнным эканамічным інтарэсам нацыі. Мільярды ў даляравым эквіваленце выкачаны з дробных і сярэдніх бізнесаў. Але яны не пайшлі на ўкараненне новых тэхналогіяў, на замену састарэлага абсталявання, на вытворчасць якасных тавараў, якія можна было б прадаць у замежжы. Краіна жыве па законах ваеннага часу, таму львіную долю бюджэту з'ядаюць сілавыя структуры, карны апарат. Гэтыя сілы ў дзесяткі разоў перавышаюць супраціў грамадства негатыўным памкненням уладных структур. За народныя грошы улада расцірае ў пыл усялякія спробы сіл, нязгодных з яе згубным курсам. Апошняе яскрава высвеціў крызіс прасавецкай калгаснай эканомікі, які ў сваім апагеі будзе катастрафічным. Улада дзеля эканоміі бюджэтных сродкаў павінна дзе ў 5, дзе ў 7, а дзе і ў 10 разоў скараціць выдаткі на гіпертрафіраваныя да пачварных памераў сілавыя структуры, зняць прэс запалохвання і пераследу шырокіх народных мас.

Гэтым Зваротам вылучаецца ідэя ўтварэння Беларускай нацыянальнай партыі. Беларуская нацыя як кансалідаваны этнас даведзена да стану, блізкага да згубы. Гэты стан патрабуе рэанімацыі. Кожны адукаваны беларус не можа лічыць сябе інтэлігентам, калі ён не патрыёт сваёй зямлі, культуры, мовы. Працяглы ўціск і пераслед уладаў выштурхнуў з палітычнага жыцця сотні тысяч актыўных людзей. У партыях засталіся сапраўдныя стоікі, людзі замардаваныя пагрозамі і пераследам, а таму малапрыгодныя для разняволенай актыўнай працы.

Сябры дзеючых партый, патрыёты беларускай нацыі! Калі дазваляе статут, прыміце дзвюхпартыйнасць! Лідэры дзеючых партый, прыміце змены ў сваіх статутах на карысць дзьвюхпартыйнасці дзеля ўтварэння моцнай Беларускай нацыянальнай партыі. Выратуем ад заўчаснага скону і будзем умацоўваць беларускую нацыю, каб заняць належнае месца сярод нацый Еўрапейскай супольнасці.

Кожны сябра ствараемай Беларускай нацыянальнай партыі няхай стане непахісным змагаром за будучыню Бацькаўшчыны! Мы непазбежна пераможам! Жыве Беларусь!

Алесь Драніцкі