Сляды кампаніі, зарэгістраванай у афшорнай зоне, прывялі да беларускага кіраўніка.

Наш сайт ужо паведамляў пра беларускія афшоры на Брытанскіх Віргінскіх выспах. У сярэдзіне чэрвеня Міжнародны кансорцыум журналістаў-даследчыкаў апублікаваў дадзеныя пра ўладальнікаў афшора і сярод іх рэдакцыя charter97.org выявіла 19 кампаній з беларускімі каранямі.

Адна з кампаній прыцягнула ўвагу журналістаў міжнароднага выдання Business New Europe (пераклад - charter97.org). Вынікі расследавання выдання пацвердзілі, што адзін з афшораў звязаны з набліжаным да сям'і Лукашэнкі алігархам. 

Гаворка ідзе пра кампанію «Interforest Corp», зарэгістраваную на жыхара Менска Аляксандра Мятлу. У Беларусі ён вядомы тым, што з'яўляецца дырэктарам дабрачыннага фонду дапамогі воінам-інтэрнацыяналістам «Памяць Афгана» і блізкім сябрам Віктара Шэймана.

Журналісты звязаліся з ім, і ён пацвердзіў, што фірма «Interforest Corp» зарэгістраваная па яго адрасе ў беларускай сталіцы, аднак растлумачыў, што гэта зрабілі «трэція асобы», а ён сам пра гэта раней не ведаў.

«Тым не менш, Аляксандр Мятла не з'яўляецца самастойным гульцом, а ўжо не ў першы раз выступае шырмай для беларускіх уладаў», - пішуць аўтары расследавання, нагадваючы пра ўдзел бізнесмена ў працэсе Віктара Шэймана супраць журналіста Сяргея Анісько ў 1999 годзе, які скончыўся закрыццём незалежнай газеты «Навіны».

Па дадзеных каталогу «Белдаведка», «Interforest Corp» звязаная з вядомай наваполацкай дрэваапрацоўчай кампаніяй СП «Інтэрфорэст», заснаванай ў 1999 годзе. Згодна з беларускім заканадаўствам, як у сумеснага прадпрыемства, у яе павінен быць замежны акцыянер. Журналістам у кампаніі заявілі, што ў яе ёсць інвестар з «Заходняй Еўропы», але адмовіліся назваць яго імя або краіну паходжання. Мятла заснаваў «Interforest Corp» усяго толькі за год да адкрыцця СП «Інтэрфорэст», што дае падставы меркаваць, што роля «замежнага інвестара» можа належаць афшору на Віргінскіх выспах.

Акцыянерам беларускага СП «Інтэрфорэст» з'яўляецца ТАА «Аўтаімпарт» і яго ўладальнік - адзін з самых багатых людзей у Беларусі наваполацкі бізнесмен Мікалай Варабей. Яго асноўны бізнес - пастаўка паліва праз ТАА «Інтэрсэрвіс». Кампанія ўжо каля 20 гадоў займаецца давальніцкай перапрацоўкай нафты на беларускіх НПЗ, у асноўным на «Нафтане» і пастаўляе яе на рынкі краін СНД і ЕЗ. «Інтэрсэрвіс» з'яўляецца самым буйным прыватным падаткаплацельшчыкам Наваполацка. Адносіны паміж прыватнай нафтавай кампаніяй і дзяржаўнымі НПЗ ужо неаднаразова выклікалі шмат пытанняў, у першую чаргу, звязаных з «растваральнікавым бізнесам».

Паводле ацэнак незалежных экспертаў, Мікалай Варабей уваходзіць у пяцёрку найбагацейшых людзей краіны з актывамі на суму звыш 2,5 мільярдаў даляраў.

«Аляксандр Мятла з'яўляецца блізкім сябрам Шэймана. Шэйман - кіраўніка справамі Лукашэнкі і яго прамы стаўленік. Знаходзячыся на гэтай пасадзе, ён фактычна кантралюе ўсе дзяржаўныя актывы. Няцяжка выказаць здагадку, што Шэйман выступаў у якасці «даху» для свайго сябра і дзейнічаў ад імя Лукашэнкі. Сувязь паміж Аляксандрам Мятлой, беларускім кіраўніком і яго заўхозам дазваляе казаць пра датычнасць беларускіх уладаў да махінацый у прыватным сектары эканомікі краіны», - робяць выснову аўтары даследавання.

Хартыя'97