Адкрыты ліст старшыні нацыянальнай БЕЛТЭЛЕРАДЫЁКАМПАНІІ Г. Б. Давыдзьку

Першы канал БЕЛТЭЛЕРАДЫЁКАМПАНІІ арганізаваў дзяржаўную прапагандысцкую падтрымку палавой стыхіі ў краіне: 18 мая гэтага года пасля 23 гадзін акурат была паказана раскошная праграма "Не только женщина знает", пранікнёная спагадай да гомасексуалаў, з усхваленнем іх чалавечай годнасці, - пры ўдзеле аднаго з герояў, суб'екта ў жаночым уборы, знешне падобнага да кікімары.

Галоўным натхняльнікам па-наватарску смелага дыспуту на блакітным экране варта лічыць Вас, старшыню тэлерадыёкампаніі, паколькі перад гэтым Вы неаднойчы выходзілі на публіку з заявамі аб легалізацыі прастытуцыі і "лёгкіх" наркотыкаў (http://telegraf.by/2012/01/persona-gennadii-davidko-predatelei-ya-na-televidenie-ne-pozovu). Вось дух Вашых заяў: «Я стойкий сторонник легализации». А ўласна, чаму?

Вы - тлумачыце як спакусу: «К примеру, 6% бюджета Нидерландов - доход от легализации проституции. Представьте себе, что такое 6% от бюджета Нидерландов. Это серьезные деньги, которые могут идти и на социальные нужды в том числе».

У іншым месцы Ваша меркаванне гучыць яшчэ больш акрэслена: "Проституцию нужно легализовать, чтобы женщины-проститутки приносили доход в казну, а не питали своим трудом теневую экономику и преступность". У Вас ужо і аднадумцы знаходзяцца. Сярод чыноўнікаў. Намеснік міністра спорту і турызму Чэслаў Шульга ў інтэрвью каналу «РТР-Беларусь» прыхільна выказаўся за развіццё секс-паслуг на турыстычных маршрутах Беларусі, маўляў, саромецца тут няварта, «гэта тое, што, да прыкладу, запатрабавана ў Даніі».

Даруйце, але ж застаюцца сумненні: ці не занадта навязліва гэтакі выбітны нацыянальны інтэлігент і дзеяч культуры як Вы пачынае заклікаць улады пераймаць на Захадзе лад жыцця і мараль па тамтэйшых "стандартах"? Не сакрэт, шаноўны, што гэтым самым мы толькі спрыяем занядбанню і развалу нашай пракаветнай культуры, а калі больш канкрэтна - яе вывераных стагоддзямі нормаў людскасці, прынцыпаў этыкі і хараства. Мяркую, што Ваш учынак дарэмны, нават калі Вы разлічваеце атрымаць ад сваіх паслуг у прадажным свеце нейкія выгоды, скажам, дадатковыя крыніцы фінансавай падтрымкі сваёй установы... Еўропа ж таксама развівае сваю эканоміку, адно не скрозь з дапамогай бардэляў - іх у большасці краін пакуль проста няма. Дадам, што калі б у нас нават і з'явілася ініцыяваная Вамі легальная прастытуцыя, то нелегальнай у грамадстве не паменшала б, як і "зацененай эканомікі", пра якую Вы згадваеце. У Аўстрыі, напрыклад, абсалютная большасць прастытутак, якія прыехалі з Усходняй Еўропы, працуюць у публічных дамах нелегальна. Так што якраз наадварот - ад рэалізацыі Вашых прапаноў узрасце культ пабочнага ды паталагічнага сексу і толькі! Яшчэ скажу: заклікаць дзяржаву ў напружаныя моманты для яе эканомікі выступіць у ролі сутэнёра, каб афіцыйна папаўняць свой бюджэт праз інтымную "працу жанчын" у дамах з чырвонымі ліхтарамі - ці не правакацыя з вашага боку? Калі не - то як тады разумець гэтакі, стрымана кажучы, паварот у Вашай свядомасці? Больш за тое, як гэта стасуецца з Вашай асветніцкай і акцёрскай працай у тэатры і кіно? Бо, аддаю належнае: у грамадскай свядомасці Вы ўсё яшчэ застаяцеся асобай з кагорты купалаўцаў, чым Вы і самі, напэўна, ганарыцеся... Драма, як бачыце! Драма, вартая таксама тэатральных падмосткаў. Але ж тэма гандлю жаночым целам выступае тут адно толькі прэлюдыяй перад тым "тэлеспектаклем", пастаўленым БТ пад замружанай назвай "Не только женщина знает", пра аднаполыя зносіны і шлюбы.

Гомасексуалізм - сур'ёзная анамальная з'ява; яна вядома даўно і рознымі народамі ўспрымаецца пераважна як адхіленне ад устойліва фізіялагічных і, вядома ж, маральных паводзін чалавека дзеля ўтаймавання заўзятых, не тут кажучы, быдлячых пачуццяў. Цікава, што паталагічная схільнасць да аднаполых уцех практычна не назіраецца ў жывёльным свеце, а толькі ў чалавечага статку, прычым, найбольш у часы таталітарнага крызісу ў грамадстве. Таму мне нават прыкра за недакладна ўжытае слова "быдлячых» - скоцкіх, бачыце, праяў, як што быдла да нашай распусты, а тым больш да яе шырокай прапаганды ніякіх адносін не мае.

Ну, што ж, я ўсведамляю, што сексапаталогія "чалавека разумнага" часта носіць характар хваробы, якую амаль немагчыма лячыць. Тым не менш аднаполыя шлюбы абражаюць як чалавечую істоту, так і прыроду-матухну.

Мімаходзь не лішнім будзе зазначыць пра моладзь. Штосьці праз меру паказное, не па-людску вывернутае, бессаромнае ўкаранілася ў звычках моладзі. Моцныя пажадлівыя абдымкі, заўзятыя пацалункі ў грамадскім транспарце, на прыпынках, у любых людных месцах - усё гэта ў апошні час стала пошасцю і носіць характар эпідэміі. А пачалося, няйначай, з рушэння традыцыйнай маралі і, так бы мовіць, культурнага табуявання ў грамадстве. Мне даводзілася бываць у розных краінах Захаду і Усходу, і, праўду казаць, нічога падобнага ў сваёй знарочыстасці, у паказусе, нястрыманасці я там не бачыў. Не думаю, што тут мы назіраем выяўленне небывалай раней закаханасці... Хутчэй у вока прэ пажадлівасць як перадумова выпадковых уцех з выкарыстаннем жаночага цела.

Пра моладзь, аднак, тут - аўтарскае адступленне; яно амаль не стасуецца з гомікамі, хоць і малюе ўвогуле сацыяльна-этычны, псіхалагічна расслаблены ды пачуццёва-эратычны план у жыццёвым прасцягу.

А ў названай вышэй праграме пра гомасексуалаў - у гэтым спектаклі, клапатліва і хораша пастаўленым у падначаленай Вам, Генадзь Браніслававіч, нацыянальнай Белтэлерадыёкампаніі, - быў ужыты прыём апытання публікі на вуліцы. Людзі адказвалі (кожны сам за сябе), як ён ставіцца да нетрадыцыйнай "любові", да аднаполых "шлюбаў", - большасць адмоўна, частка - абыякава, некаторыя «если им приятно - пусть!» Ніхто ў сваіх хапатлівых экспромтах не паспрабаваў адказаць, як паўплываюць аднаполыя шлюбы на грамадзянскую супольнасць, калі праз СМІ і асабліва ТВ-каналы будзе прышчапляцца людзям маральна-паталагічная разбэшчанасць. У Расіі ўжо зразумелі, што распаўсюджванню гомасексуалізму па ўсёй разлеглай краіне пасадзейнічалі СМІ. І не дзіва!

Падобныя шлюбы проста мяняюць структуру грамадства, памнажаюць эгацэнтрызм, змяншаюць нараджэнне дзяцей, спрыяюць распаўсюджванню СНІДу. І паказальна, што яшчэ ў ХIII стагоддзі рымскі багаслоў і філосаф Тамаш Аквінскі прымаў як належнае і дабратворнае -натуральныя шлюбы; у іх захоўвалася інтымнасць адносін паміж мужам і жонкай, заснаваная на іхнім духоўным і інтэлектуальным адзінстве, што ў сваю чаргу абумаўлівала схільнасць да сталай вернасці ў пары. У маральнасці звычайных шлюбаў паміж мужчынам і жанчынай быў добры падмурак, які бачыўся як «галоўнае зямное дабро чалавека», што не дазваляла знябыцца чалавечаму роду. Менавіта гэтакае ўяўленне пра дабро і адпаведнасць людскасці шлюбаў гістарычна склалася ў беларускім грамадстве, якое паспяхова развівалася. Іншае, бадай, ішло ад д'ябла. І Святы Тамаш Аквінскі разам з тым недвухсэнсоўна выступаў за маральныя прадпісанні, дзеля рэгулявання сексуальнасці і забароны некаторых форм сексуальных адносін, акурат тых, якія зусім не накіраваныя на дасягненне пералічаных вышэй даброт, а хутчэй - да бязладнага плоцевага задавальнення, што для грамадства зноў жа - благі знак і пошасць.

Тут мне акурат падвярнуўся яшчэ адзін нечаканы выхад на тэму. На форуме сайта «Мы - нацыя!» чытач, зайшоўшы праўда здалёку, - ад магчымага дыктату пры ўступленні ў СГА (ВТО) і пераходзе ўсёй маёмасьці, прамысловасці, фінансаў і зямлі ў рукі сусветнай алігархіі, напісаў: "Нам застанецца магчымасьць есьці іхняю штучную хрэнь пасля якой мужчына ўступае ў шлюб з другім самцом і тым самым праз нейкі час наогул вызваляе сваю тэрыторыю ад тутэйшых".

Мяркую, што сам па сабе вывад з паўценяў гэтай паталагічнай тэмы ў паласу асвятлення - дзеля прызнання грамадзянства за блакітнымі і лесьбіянкамі дый легалізацыі іх аднаполых шлюбаў - не могуць не нанесці сур'ёзнай шкоды беларускай супольнасці, бо з фізіялагічнымі, як і псіхічнымі, захворваннямі трэба лічыцца і прызнаваць за імі статус хваробы; а ўжо ўсё тое, чаго дамагаецца БТ (прызнаць іх за норму чалавечых паводзін, глядзець як на забаву, як на новую моду ў грамадстве), усё тое нельга не параўнаць з дамаганнем выпуску вар'ятаў на волю.

Вы, шаноўны і паважаны мной артыст Генадзь Браніслававіч, іграеце тут, з дазволу сказаць, не самую лепшую ролю, хоць Ваша мяккае сэрца і гатова ашчаслівіць гомасексуалістаў.

Кіраўніку ж дзяржаўнай БЕЛТЭЛЕРАДЫЁКАМПАНІІ, як на маю думку, у наш час патрэбна быць больш выспелым дзяржаўным мужам і па-грамадзянску - ну, хоць як, хоць на каліва мудрэйшым. Бо, апроч сваіх суб'ектыўных жаданняў, намыслаў і лібералізаваных пераконанняў «аўтарытарнага дэмакрата», якім Вы сябе абвясцілі, варта яшчэ кіравацца стратэгіяй развіцця грамадства і краіны, у якой жывеш.

Гэты ліст я скончу словамі Янкі Брыля: «Калі б беларуса п р ы м у с і ц ь быць беларусам, які б атрымаўся выдатны беларус!»

Давайце ж быць беларусамі, што значыць - самімі сабой.

Васіль Якавенка, пісьменнік
«Народная воля» №93-94 за 15 чэрвеня 2012 г.