Міхаіл КЕНЬКА, тэкст і фота

10 ліпеня 2011 г. у Ракаве адбылося літаратурна-мастацкае свята "Быў. Ёсць. Буду" у гонар класіка беларускай літаратуры Уладзіміра Сямёнавіча Караткеіча. Нагодай для свята стала адкрыццё мемарыяльнай шыльды, прысвечанай пісьменніку. Яна ўсталявана на сядзібе, у якой да пераезду ў Мінск жыла сям'я доктара філалагічных навук, прафесара, вядомага пісьменніка і літаратуразнаўцы Вячаслава Пятровіча Рагойшы. Словы, выбітыя на шыльдзе тлумачаць: "Гэты дом часта па-сяброўску наведваў класік беларускай літаратуры Уладзімір Караткевіч". Так, ён неаднаразова бываў у доме Рагойшаў, яму вельмі падабаўся Ракаў, яго жывапісныя ваколіцы, тут ён і адпачываў, і пісаў вершы. Задума ўсталяваць шыльду ў памяць Уладзіміра Караткевіча ўзнікла ў Вячаслава Рагойшы даўно, і была ажыццёўлена з дапамогай народнага мастака Рэспублікі Беларусь, скульптара Івана Міско, які на грамадскіх пачатках выканаў гэтую работу. Адліўка шыльды ў алюмініі зроблена на сродкі сям'і Рагойшаў. 

На ўрачыстае адкрыццё шыльды сабраліся ракаўчане і госці - вядомыя пісьменнікі, вучоныя. У сядзібе Рагойшаў удзельнікі свята агледзелі літаратурна-мемарыяльны куток Уладзіміра Караткевіча, дзе прадстаўлены фотаздымкі, кнігі з аўтографамі, копіі рукапісаў і малюнкаў пісьменніка.

Урачысты момант адкрыцця

У першыя хвіліны пасля адкрыцця - В. Рагойша, І. Міско, В. Адамовіч

Здымак на памяць

Спяваюць артысты ансамбля

І вось самы ўрачысты момант - з шыльды здымаюць палатно, якое закрывала яе, загадчык аддзела культуры Валожынскага раённага аддзела культуры Вікенці Леанідавіч Адамовіч, Іван Якімавіч Міско і Вячаслаў Пятровіч Рагойша. Асвяціў шыльду настаяцель Ракаўскай Свята-Прэабражэнскай царквы айцец Сергій.

Каля сядзібы, а потым у мясцовым Доме культуры выступілі прадстаўнікі Беларускага фонда культуры Уладзімір Гілеп і Анатоль Бутэвіч, рэдактар "Маладосці" Таццяна Сівец, пляменніца Караткевіча Алена Сінькевіч, паэты Віктар Шніп, Людміла Рублеўская, Навум Гальпяровіч, навукоўцы Пятро Рогач, Пятро Жаўняровіч, а таксама і тыя, хто сваімі намаганнямі садзейнічаў усталяванню мемарыяльнай шыльды - Іван Міско і Вячаслаў Рагойша. Свята прадоўжылі калектывы мастацкай самадзейнасці. Для таго, каб яно прайшло на належным узроўні, парупіліся аддзел культуры Валожынскага райвыканкама, работнікі Ракаўскага сельсавета. Гучалі вершы Караткевіча, песні, сваё майстэрства паказалі майстры дэкаратыўна-прыкладнога мастацтва Валожыншчыны.