12.11.2009

Прэзідэнту Рэспублікі Беларусь
А. Р. Лукашэнку

Паважаны Аляксандр Рыгоравіч!

На пачатку чэрвеня гэтага года на Ваша імя быў перасланы Зварот у абарону беларускай мовы, падпісаны вядомымі дзеячамі беларускай навукі і культуры, святарамі, настаўнікамі, рабочымі і службоўцамі, пенсіянерамі і студэнтамі - у ліку 183-х асоб. Мы спадзяваліся, што гэты ліст са шматлікімі подпісамі дойдзе да Вас і Вы на яго адгукнецеся, паколькі пытанні, узнятыя ў ім, вельмі і вельмі важныя, ад іх вырашэння залежыць далейшае развіццё нацыянальнай культуры і бяспека дзяржавы. На вялікі жаль, мы не заўважылі і не адчулі Вашай увагі да гэтага ліста, хоць у выніку нашай перапіскі з іншымі дзяржаўнымі дзеячамі і прадстаўнікамі ураду нешта ў грамадстве істотна скранулася. Грамадства разумее і падтрымлівае Зварот. А Дзяржава?..

Не маючы пэўнасці у вырашэнні пастаўленых у Звароце пытанняў, грамадзяне Беларусі тым часам працягваюць пісаць Вам лісты і далучацца да абаронцаў дзяржаўнай беларускай мовы. Вось і цяпер у якасці дадатку да гэтага пісьма мы перасылаем Вам дзве публікацыі газеты "Народная воля" - "Далучайцеся" і "Ці хутка развіднее на векавечных абсягах нацыянальнай культуры?" - з новымі подпісамі у падтрымку Звароту, учыненымі дзесяткамі і сотнямі нашых суайчыннікаў, а да апошняй публікацыі далучаем яшчэ і подпісы, якія не публікаваліся, як не публікаваліся і подпісы грамадзян у ліку трох соцень, перасланыя на ваша імя з горада Слуцку. Усяго ж пад Зваротам, пад ягонымі прапановамі і патрабаваннямі падпісаліся ў гэтае лета не меней 900 чалавек, і кожны з іх, ставячы свой подпіс, натуральна разлічваў і разлічвае на Вашу ўвагу і павагу, прыхільнасць да голасу народа, прынамсі, да той яго часткі, якую нярэдка называюць элітай, сумленнем нацыі. Усё там ёсць. Толькі Вы маўчыце. Чаму?

Нядаўна мы атрымалі пісулю, інакш не скажаш, ад аднаго з дзеячаў Адміністрацыі Прэзідэнта. Усяго некалькі слоў: маўляў, радуйцеся, вашы прапановы будуць "па магчымасці" ўлічаны "зацікаўленымі дзяржаўнымі органамі". Мы былі б вельмі рады даведацца, ці ёсць у нас зацікаўленыя роднай мовай органы, аднак: якія ж яны і дзе яны? Ніхто ж іх пэўна не ведае.

Тым не менш у грамадстве пасля нашага Звароту, паўтараем, пайшоў пэўны зрух, і яго важна было б замацаваць і далей развіць. Таму мы і чакаем ўсё-ткі разгляду наспелай да крытычнага стану праблемы асабіста Вамі .

З павагай, ад імя падпісантаў

Васіль Якавенка, пісьменнік, каардынатар грамадзяскай ніцыятывы "Інстытут нацыянальнай памяці", якая падрыхтавала Зварот.

Кантактны тэлефон: +29 30 44 044 Velcom