Часовы павераны ў справах ЗША ў Рэспубліцы Беларусь спадар Ітан Голдрыч
вул. Старавіленская, 46, Мінск 220002
Амбасадар Французскай Рэспублікі ў Рэспубліцы Беларусь спадарыня Дамінік Газюі
пл. Свабоды, 11, 220030 Мінск
Амбасадар Вялікабрытаніі і Паўночнай Ірландыі ў Рэспубліцы Беларусь спадар Брус Бакнэл
вул. Карла Маркса, 37, Мінск 220030
Надзвычайны і Паўнамоцны Амбасадар КНР у Рэспубліцы Беларусь спадар Цуй Цымін
вул. Берасцянская, 22, г. Мінск 220071

Шаноўнае спадарства!

Рух Салідарнасці "Разам" вельмі занепакоены крызіснай сітуацыяй, якая ўзнікла, дзякуючы неадэкватным дзеянням уладаў Расійскай Федэрацыі, што ўвялі свае войскі ва Ўкраіну, і якія 27 лютага 2014 года здзейснілі захоп урадавых будынкаў Аўтомнай Рэспублікі Крым. На 16 сакавіка 2014 года ва ўмовах практычнай акупацыі Аўтаномнай Рэспублікі Крым Украіны быў прызначаны рэферэндум з мэтай далучэння Крыма да Расійскай Федэрацыі. Нягледзячы на знешне анекдатычнае з юрыдычнага пункту гледжання "рашэнне пра рэферэндум", на правядзенне якога даецца 10 сутак, гэты крок уладаў Расійскай Федэрацыі парушае Будапешцкі мемарандум 1994 года, які гарантаваў Украіне, Беларусі і Казахстану тэрытарыяльную цэласнасць і суверэнітэт узамен на адмову ад валодання ядзернай зброяй. Як вядома, гарантамі Будапешцкага мемарандума 1994 года з'яўляліся: сённяшні агрэсар - Расійская Федэрацыя, а таксама Вялікабрытанія і Злучаныя Штаты Амерыкі. Такім чынам, у выніку агрэсіі з боку Расіі любой краіне даецца права валодаць ядзернай зброяй, бо атрымліваецца, што нікчэмнымі з'яўляюцца міжнародныя дамовы наконт ядзернай зброі, нават калі выкананне гэтых дамоваў гарантуецца пастаяннымі сябрамі Рады Бяспекі ААН. Таму вядомыя палітыкі і грамадскія дзеячы ў розных краінах свету засумняваліся ў псіхічным здароўі Ўладзіміра Пуціна і параўналі яго палітыку да Крыму напрыканцы лютага - у сакавіку 2014 года з палітыкай Гітлера ў адносінах да Судэтаў у 1938 годзе. Як вядома, Гітлер апеляваў да таго, што ў Судэтах жыве нямецкае насельніцтва. Уладзімір Пуцін апелюе да таго, што ў Крыме жыве расійскае.

Акрамя таго, звяртаем вашу ўвагу на наступныя акалічнасці: аднагалоснае галасаванне ў Парламенце Расійскай Федэрацыі за дазвол увядзення войскаў ва Ўкраіну, адсутнасць крытыкі дзеянняў Уладзіміра Пуціна з боку расійскіх палітыкаў, якія займаюць высокія дзяржаўныя пасады, факты адкрытай хлусні ў афіцыйных заявах расійскага кіраўніцтва і падкантрольных яму СМІ, жорсткае здушэнне пратэстаў прадстаўнікоў расійскай грамадскасці супраць магчымай вайны паказалі, што ў Расійскай Федэрацыі адсутнічае палітычная адэкватнасць і павага да нормаў міжнароднага права на ўсіх узроўнях дзяржаўнай ўлады.

Як вам вядома, беларуская нацыя жахліва пацярпела ад дзвюх імперыялістычных войнаў, якія вяліся на яе тэрыторыі ў ХХ стагоддзі. Таму мы выступаем катэгарычна супраць руйнавання сістэмы міжнароднай бяспекі і агрэсіўных паводзінаў Расійскай Федэрацыі.

Просім вас, як прадстаўнікоў краін-сяброў Рады Бяспекі ААН не толькі зрабіць усё магчымае, каб спыніць агрэсію Расійскай Федэрацыі супраць Украіны, але і паставіць пытанне, ці можа Расійская Федэрацыя, як краіна-агрэсар, улады якой кожны дзень з пачатку крымскага крызісу даводзяць сваю неадэкватнасць, быць пастаянным сябрам Рады Бяспекі ААН.

Просім дзейнічаць, бо агрэсія Расійскай Федэрацыі доўжыцца з 27 лютага 2014 года, і з таго часу мы ўсе знаходзімся ў небяспецы пачатку ваенных дзеянняў.

З павагай,
Старшыня Руху Салідарнасці "Разам" Вячаслаў Сіўчык
7 сакавіка 2014 г.