Іосіф СЯРЭДЗІЧ, галоўны рэдактар газеты "Народная воля"   •  

Доўгачаканы дзень наступіў! 
"Народная воля" - зноў на волі!   Блакада, якая мёртвай хваткай тры гады сціскала горла "Народнай волі", прарвана! 
Мы - вярнуліся! Ужо сённяшні нумар аддрукаваны не ў замежным Смаленску, што амаль за 400 кіламетраў ад Мінска, а ў выдавецтве "Беларускі Дом друку".  

Выжылі ў трэці раз. За няпоўныя чатырнаццаць гадоў "Народная воля" тройчы вымушана была на працягу доўгага часу друкавацца за мяжой. Першыя два разы - у Літве, апошні раз - у Расіі.

Выжылі - таму што мы былі разам, шаноўныя чытачы! Вы не кінулі нас у бядзе, вы, як і мы, не здрадзілі галоўнаму - шчыраму сяброўству. Разам ратавалі "Народную волю" - адну з першых ластавак свабоднага слова, нястомную прыхільніцу Беларускага Адраджэння, дэмакратычных перамен у грамадстве і дзяржаве.

Дзякуй, вялікі дзякуй вам, паважаныя сябры!

Дзякуй усім, хто тры блакадныя гады дапамагаў саматужна распаўсюджваць газету!

За "Народную волю" змагалася беларуская апазіцыя. За "Народную волю" змагаліся ўсе, каму неабыякавы лёс Беларусі. Дзякуй, даражэнькія!

Вядома ж, дзякуй за тую надзвычай важную падтрымку, якую "Народная воля" ўвесь час адчувала з боку замежнай дэмакратычнай грамадскасці, з боку кіраўнікоў многіх краін і сусветна вядомых палітычных дзеячаў!

Як хочацца, каб усё горшае засталося ў мінулым. І не толькі для "Народнай волі". Праблемы, якія вырашыліся для нашага выдання, "Нашай Нівы", на жаль, пакуль не вырашыліся для шэрагу іншых газет.

Спадзяванняў на лепшае няшмат, але ўсё ж яны ёсць. Праўда, тут погляды разыходзяцца. Паважаная намі Ірына Халіп напісала: "Лукашэнка ўсяго толькі напамінае ўсім нам, хто ў краіне гаспадар: хоча - забараняе, хоча - дазваляе. А калі і дазваляе, то ўсё адно не ўсім. Праз месяц-другі яму надакучыць гэтая гульня - і ў шапіках зноў застануцца хіба што "Японскія крыжаванкі". Са спадарыняй Халіп уступіў у дыскусію наш пастаянны аўтар, вядомы публіцыст Сямён Букчын: "Паганая эканамічная сітуацыя ў краіне прымушае вышэйшае кіраўніцтва ісці насустрач пажаданням Еўрасаюза. Хто спрачаецца з тым, што заўтра ў кіёсках ізноў могуць застацца толькі "Японскія крыжаванкі"? Яшчэ як могуць! Але ж ёсць і рэальны факт! Рэжым адступіў. Саступіў. Назавіце гэта як хочаце. Але саступка відавочна.

Што - было б лепш, калі б "Народная воля" працягвала друкавацца ў Смаленску? Не лічу"вяртанне" нават дзвюх газет "малой справай". Хаця і не перабольшваю значэнне гэтай падзеі..."

Хто з нашых паважаных калег мае большую рацыю - не станем вызначаць. Заўважым толькі: апынуўшыся на свабодзе, "Народная воля" будзе дабівацца таго, каб сітуацыя са свабодай слова ў краіне была зменена кардынальна. Мы не адмаўляем Мілінкевічу ці Казуліну ў праве выступаць на старонках "Народнай волі". Але ж такі доступ яны павінны мець і да старонак "Советской Белоруссии", "Звязды", "Рэспублікі", да эфіру Беларускага тэлебачання, радыё. Пакуль прадстаўнікі апазіцыі будуць знаходзіцца ў рэзервацыі, пляскаць у далоні рана.

Цяжкая праца чакае нас усіх! Для народавольцаў рэарганізацыйны перыяд - чарговае выпрабаванне. Мы робім толькі першыя свабодныя крокі, а нам ужо дыктуюць жорсткія ўмовы: "Каб газета друкавалася ў выдавецтве "Беларускі Дом друку" - ганіце перадаплату на месяц наперад". Аддаём тысячы экземпляраў газет у шапікі, а нам: "Грошы атрымаеце не хутка, можа, праз паўтара месяца, а можа, і пазней". Пры гэтым, паводле дамоваў "Белсаюздрук" будзе забіраць сабе 55 працэнтаў ад адпускной цаны. На прадукты харчавання, прамысловыя тавары паўсядзённага попыту нацэнка абмежаваная, а тут - во якая накрутка! Манаполія дыктуе свае ўмовы!

Як выкруціцца? Каго гэта хвалюе... Пішу гэтыя радкі, а галава кругам ідзе: і тое трэба, і другое, і трэцяе, і... пятае, дзесятае. Патрапіўшы ў шапікі і падпісныя каталогі, мы дзеля падстрахоўкі пакуль захаваем альтэрнатыўную сістэму распаўсюджвання газеты. Сёння, шаноўныя чытачы, вы можаце выбіраць любую форму падпіскі - праз паштовыя аддзяленні, падпісныя пункты ці праз рэдакцыю. Звернем увагу на такую акалічнасць: з новага года "Народная воля" будзе з'яўляцца ў вас два разы ў тыдзень, па аўторках і пятніцах. У нумарах напярэдадні выхадных вырашана змяшчаць тэлепраграму. Дарэчы, наша мэта - ужо да канца першага паўгоддзя выйсці на пяціразовы выхад газеты ў тыдзень. Так, як гэта некалі было! А каб усё стала на свае месцы, трэба мацаваць эканоміку рэдакцыі. Вялікі разлік на рэкламадаўцаў.

Нехта можа падумаць, што нам вярнулі свабоду ў абмен на нейкія палітычныя ўмовы. Ніякіх умоваў не было, ды мы і не пайшлі б на іх. "Народная воля" была дэмакратычнай, незалежнай газетай, яна ёю і застанецца. Мы прынцыпамі не гандлюем!

На гэтай высокай ноце і хочацца скончыць ліст да вас, шаноўныя чытачы, прыхільнікі беларушчыны.

Вы - з "Народнай воляй!

"Народная воля" - з Вамі!

Народня воля. 2.12.2008   №183-184