У Вільні знайшлі забітым старшыню Згуртаваньня беларускіх грамадзкіх суполак Літвы і клюбу «Сябрына» Рамана Вайніцкага.

Дырэктарка беларускай гімназіі імя Скарыны ў Вільні Галіна Сівалава распавяла карэспандэнту «Свабоды»:

«Раніцай яго знайшлі зьвязанага, замучанага ў падвале шматпавярховага дома, дзе ён жыў. Ён расказваў, што яму апошнім часам пагражалі, нават сядалі да яго ў аўто і пагражалі. Яго спачатку шукалі на працы, бо машына была каля дому, ключы ляжалі, а яго не было. Потым убачылі, што няма ключоў ад падвала».

Таварыш забітага ў Вільні беларускага дзеяча: Да яго званілі і казалі, што ўжо з некім расправіліся  

Як паведаміла віленская паліцыя, «жудаснае забойства» было ўчыненае ў падвале шматпавярховага дому на вул. Капсу. Ахвяра была знойдзеная зьвязаная, з заклеенным ротам.

Паліцыя атрымала паведамленьне у 9.30 раніцы сёньня ад жонкі забітага, якая знайшла цела мужа, калі спусьцілася раніцай у падвал.

Паводле папярэдніх зьвестак, сьмерць сталася вынікам катаваньняў, на целе знойдзены сьляды фізічных катаваньняў. 

Вайніцкі Раман Генрыхавіч

[17.08.1960, в.Вішнева Валожынскага р-на Мінскай вобл.]

Актывіст беларускага руху ў Літве.

Бацька Вайніцкі Генрых Эдвардавіч родам з урочышча Гнілуха (цяпер Іўеўскі р-н Гродзенскай вобл.), маці Вайніцкая (Базык) Галіна Юльянаўна паходзіць з в.Янішкі Валожынскага р-на Мінскай вобл.

Р.Вайніцкі вучыўся ў Вішнеўскай сярэдняй школе (1967 - 1977), пасля заканчэння працаваў на мясцовым дрэваапрацоўчым прадпрыемстве "Клім" .Ваенную службу праходзіў ў вайсковых часцях у Нясвіжы і Маладзечне (1978 - 1980). Пасля звальнення з арміі паступіў у Калінінградскую мараходную школу, затым працаваў механікам на Калінінградскай базе тралавага экспедыцыйнага флоту на караблях замежнага плавання.

У 1991 г. пераехаў у Літву, працаваў кіраўніком групы хіміі ў аддзеле забеспячэння Віленскага вытворчага аб'яднання ім. 60-годдзя Вялікай кастрычніцкай рэвалюцыі, адначасова прымаў удзел у грамадскай дзейнасці, з'яўляўся адным з начынальнікаў беларускага адраджэння ў Літве. З пачатку заснавання Віленскай беларускай школы ім. Ф.Скарыны (1994) уваходзіць у склад адміністрацыі школы. Аддае шмат сіл каб школа стала астраўком беларускага жыцця ў Вільні. Працуе намеснікам дырэктара школы па цяперашні час.

З 1995 г. Р.Вайніцкі - кіраўнік клуба аматараў беларускай народнай творчасці "Сябрына", першай беларускай грамадскай арганізацыі ў Літве. З 1995 г. - у складзе Савета нацыянальных меншасцей дэпартамента нацыянальных меншасцей і эміграцыі пры кіраўніцтве Літоўскай Рэспублікі. Па запрашэнні Савета Еўропы прымаў удзел у міжнароднай канферэнцыі "Роля нацыянальных меншасцей у распрацоўцы і прыняцці законаў у краінах кампактнага пражывання" (Славенія, 1995).

Р. Вайніцкі з'яўляецца ініцыятарам склікання ўстаноўчага схода прадстаўнікоў беларускіх грамадскіх арганізацый Літвы (верасень 1996), на якім было створана Згуртаванне беларускіх грамадскіх арганізацый Літвы, быў абраны віцэ-прэзідэнтам, у кастрычніку 2009 г. - прэзідэнтам Згуртавання.

Па запрашэнні Фонда адкрытай Даніі прымаў удзел у вывучэнні і вырашэнні праблем нацыянальных меншасцей і азнаямленні з сістэмай адукацыі немцаў у Даніі і данаў у Нямеччыне (1997). Наведваў Бельгію, Польшчу, Германію, Швейцарыю, Галандыю, Францыю з мэтай азнаямлення з працай Еўрапарламента і НАТА (2006, 2010).З жніўня 2009 г. Р. Вайніцкі з'яўляецца прадстаўніком Савета нацыянальных меншасцей пры Міністэрстве культуры Літоўскай Рэспублікі, а з 2 верасня 2009 г. - дарадчыкам прэм'ер-міністра Літвы па каардынацыі і супрацоўніцтву з нацыянальнымі меншасцямі Літвы. Р. Вайніцкі ўваходзіць у склад Каардынацыйнага савета па справах беларусаў замежжа (Мінск).