Сёння Аляксандр Круты ізаляваны ад сваёй сям’і

Аб падтрымцы пацярпелай у тэракце 11 красавіка 2011 года Інэсы Крутой і ўратаванні яе сям'і.

Інэса Крутая - дачка вядомага беларускага праваабаронцы Аляксандра Крутога. Яна стала адной з ахвяраў жахлівага тэракта ў мінскім метро 11 красавіка 2011 года. Падчас выбуху ў яе трапіла 42 асколкі, з якіх медыкамі было выдалена толькі 2. Па сённяшні дзень яна знаходзіцца ў вельмі цяжкім стане. Нягледзячы на моцныя галаўныя болі ў выніку траўмы Інэса вымушана працаваць і адначасова пераадольваць бюракратычныя перашкоды: шматлікія даведкі, камісіі, дадатковыя даследванні, штучна створаныя медыцынскімі ўстановамі. Але, маральны і фізічны стан дзесяткаў пацярпелых у тэракце ўладамі не ўлічваецца, таму не праводзіцца сапраўдная іх рэабілітацыя. Улады не жадаюць забяспечваць пацярпелых неабходнай дапамогай.

Інэса Крутая пазбаўлена законнага права...

Аляксандр Круты, як бацька пацярпелай і як прафесійны праваабаронца, намагаўся высветліць праўду аб тэракце. Ен быў адзін з нешматлікіх прадстаўнікоў пацярпелых, які дасканала знаёміўся з тамамі крымінальнай справы. У праваабаронцы ўзнікла шмат пытанняў да хода следства - не гледзячы на тое, што ўлады прыкладалі ўсе намаганні, каб пацярпелыя не займалі на судзе актыўную пазіцыю. Калі распачаўся суд, вострыя пытанні Крутога змусілі замаўчаць абвінавачанага Канавалава. У выніку, улады выдалілі Крутога з суда і змясцілі яго ў псіхіятрычнай установе.

Сёння Аляксандр ізаляваны ад сваёй сям'і. Дачка пазбаўлена законнага права пабачыцца з бацькам ці атрымаць звестку аб яго стане. Відавочна, што ў Беларусі адраджаецца карная псіхіятрыя. А судовы працэс па жахліваму тэракту ўлады ператварылі ў фарс.

Звароты сям'і Крутых аб атрыманні палітычнага прытулку ў любой з дэмакратычных краінаў былі не пачутыя. Рух Салідарнасці "Разам" звяртаецца да дэмакратычнай супольнасці аказаць дапамогу сям'і Крутых. Патрабуем неадкладнага вызвалення Аляксандра Крутога.

Вячаслаў СІЎЧЫК, старшыня Руху Салідарнасці "Разам"